मॉस्को : रशियाने आपल्या शेजारील देशावर आक्रमण केल्यापासूनच्या सर्वात मोठ्या ड्रोन हल्ल्यांपैकी एका हल्ल्यात, युक्रेनने आठवडाभरात दुसऱ्यांदा मॉस्कोमधील एका मोठ्या तेल शुद्धीकरण प्रकल्पाला लक्ष्य केले. मॉस्कोच्या विमानतळांवरील व्यावसायिक विमानसेवा विस्कळीत केली, अशी माहिती रशियन अधिकाऱ्यांनी गुरुवारी दिली. युक्रेनचे राष्ट्राध्यक्ष वोलोडिमिर झेलेन्स्की यांनी अमेरिकेचे राष्ट्राध्यक्ष डोनाल्ड ट्रम्प आणि फ्रान्सचे राष्ट्राध्यक्ष इमॅन्युएल मॅक्रॉन यांच्यासोबत "एक महत्त्वपूर्ण समन्वय बैठक" घेतल्याचे आणि त्यामुळे "महत्त्वपूर्ण बदल घडून येऊ शकतात" असे सांगितल्यानंतर काही तासांतच हा हल्ला झाला. झेलेन्स्की बुधवारी म्हणाले की, फ्रान्समध्ये सुरू असलेल्या जी7 शिखर परिषदेत सहभागी झालेल्या अमेरिकेसह जागतिक नेत्यांकडून त्यांच्या देशाला पुढील पाठिंब्याची महत्त्वाची आश्वासने मिळाली आहेत.
रशियन प्रसारमाध्यमांनी प्रसिद्ध केलेल्या छायाचित्रे आणि व्हिडिओमध्ये, क्रेमलिनपासून सुमारे 15 किमी (9 मैल) अंतरावर असलेल्या मॉस्को ऑइल रिफायनरीमध्ये भीषण आग लागल्याचे दिसून आले. शहरावर धुराचे दाट काळे लोट पसरले होते. अधिकृत संकेतस्थळावरील माहितीनुसार, मॉस्को ऑइल रिफायनरी ही रशियातील सर्वात मोठ्या रिफायनरींपैकी एक असून राजधानीच्या क्षेत्रातील इंधन बाजाराचा एक तृतीयांशाहून अधिक हिस्सा तिच्याद्वारे पुरवला जातो. 16 जून रोजी युक्रेनियन ड्रोनद्वारे या रिफायनरीवर शेवटचा हल्ला करण्यात आला होता. ज्यामुळे तिथे आग लागली होती. मात्र अधिकाऱ्यांनी दिलेल्या माहितीनुसार, ती आग त्वरित विझवण्यात आली. युक्रेनने वारंवार रशियाच्या तेल सुविधांना लक्ष्य केले आहे. याचा उद्देश युद्धासाठी रशियाला मिळणारे उत्पन्न कमी करणे आणि आक्रमणाचे परिणाम रशियन जनतेला जाणवून देणे हा आहे. मॉस्कोमधील चार विमानतळांवरील विमानसेवा तात्पुरती थांबवण्यात आली असल्याचे परिवहन आणि विमान वाहतूक प्राधिकरणांनी सांगितले.
मॉस्कोच्या आसपासच्या भागात, झुकोव्स्की शहरात एका निवासी इमारतीवर ड्रोन आदळले आणि त्या इमारतीतील लोकांना बाहेर काढण्याचे काम सुरू होते, अशी माहिती गव्हर्नर आंद्रे वोरोब्योव्ह यांनी दिली. याच भागातील इतर ठिकाणी ड्रोनचे अवशेष खासगी घरे, एक कार, एक फिटनेस सेंटर, एक औद्योगिक सुविधा (ज्याचा तपशील दिलेला नाही) आणि एका मोठ्या मॉलवर पडले. या मॉलच्या छताला आग लागली, असे वोरोब्योव्ह यांनी सांगितले. यात एक महिला जखमी झाली असल्याचेही त्यांनी नमूद केले. रशियन संरक्षण मंत्रालयाने सांगितले की, त्यांच्या हवाई संरक्षण यंत्रणेने रात्रीच्या वेळी विविध क्षेत्रांवर 555 युक्रेनियन ड्रोन पाडले. यापैकी रशियाची राजधानी असलेल्या शहराकडे कूच करणाऱ्या सुमारे 200 ड्रोनना रोखून पाडण्यात आले. युक्रेनियन हवाई दलाच्या माहितीनुसार, रशियाने त्याच रात्री युक्रेनवर सोडलेल्या ड्रोनच्या संख्येच्या तुलनेत ही संख्या साधारणपणे दुप्पट होती. कीव्हमध्ये स्फोटांचे आवाज ऐकू आले आणि युक्रेनच्या बहुतांश भागासाठी हवाई हल्ल्याचा इशारा जारी करण्यात आला.
